走肖：尹佩斯魔性大發 曼聯屠城

再冇貨交隨時被叮
英超快車今晚大把直播睇，曼聯喺主場對史篤城，當然係焦點之一。最近紅魔連贏3場反彈，射手尹佩斯收到風可能被賣走後，上場即刻發威交出1次助攻、1個入球，為咗避免變成過期罐頭被扔走，今場佢梗係要繼續入波幫大家開2.05倍「讓球主勝」啦！

（now621台周三凌晨3:45直播）

曼聯日前以3:0打沉侯城，尹佩斯除咗助攻畀拍檔朗尼建功外，仲親自射入靚波。點解尹佩斯突然翻生？大家有留意近排嘅新聞，應該可以得到答案，最近有傳聞話，紅魔要求佢減薪6成續約，否則會以1,200萬歐元（約1.16億港元）嘅價錢，將佢賣到意甲嘅國際米蘭喎！

雙防守中場靠得住
咁都唔止，近期有調查顯示，球迷覺得法卡奧較尹佩斯更值得打正選，甚至連曼聯領隊尹戈爾都開口鬧佢表現唔對路，之前鬥阿仙奴正選上陣75分鐘得13次掂波，尹佩斯都知衰，對住侯城即大打爭氣波，證明自己依然有足夠實力為曼聯効力。

雖然迪馬利亞對侯城受傷，搞到曼聯傷兵問題更加嚴重，不過佢哋近排用番費蘭尼同卡域克打雙防守中場，後防穩陣番好多，加上對侯城後備入替嘅安達靴里拉表現大受好評，只要尹佩斯同朗尼繼續有料到，相信紅魔有條件延續3連勝嘅氣勢贏波。

史篤城靠晒紅魔棄將
史篤城日前以0:1不敵利物浦，開季後表現普通，雖然領隊曉士球員時代係曼聯當家射手，但轉行做領隊後似乎愈撈愈霉，何況佢哋嘅前鋒馬美迪奧夫都只係曾經被紅魔放棄嘅次貨，旨意佢幫史篤城搶分，真係蚊都瞓，何況薛維爾、格連韋爾兩件中場未知出唔出得，家陣曼聯殺氣騰騰，追多鋪冇壞。

Data King：史篤城征奧脫福輸慣
曼聯連續5場賽事半場不失。

曼聯近6場主場有5勝1和。

史篤城近8次聯賽作客奧脫福球場輸晒。

自1984年後，史篤城未試過喺聯賽擊敗曼聯。

乜都玩錦囊：曼聯慢熱吼3.65倍「和主」
曼聯最近翻生，主場對史篤城贏面當然大，但如果大家嫌紅魔1.33倍主勝太奀，不妨考慮玩曼聯「和主」，因為佢哋近5場有4次半場踢成0:0，唯一例外係日前以3:0砌低侯城嗰場，上半場就領先兩粒，假如各位覺得紅魔近排慢熱，就揀3.65倍「和主」！