卡爾萬：皇馬-3 照炒丙組仔

挑戰巴塞18連勝紀錄
今晚西盃第4圈次回合，西甲「一哥」皇家馬德里主場迎戰丙組哥尼拿，「銀河艦隊」日前擊敗馬拉加之後累積16連勝，創下球會史上最長連勝紀錄，班人士氣如虹都唔住，目前再進一步挑戰宿敵巴塞隆拿最長連勝紀錄，今場遇着哥尼拿勢必再開殺戒，讓3球都照捧1.6倍「讓主」！

（now632台周三凌晨3:00直播）

皇馬上場刷新球會最長連勝紀錄後，咪以為佢哋冇晒奮鬥目標，事關宿敵巴塞喺05至06年球季曾經創造18連勝紀錄，再者連同今場在內，「銀河艦隊」嚟緊3場都喺巴拿貝出戰唔在講，對手更係哥尼拿、切爾達同盧多格德斯呢啲平庸之輩，試問主帥安察洛堤點會收油唔去先！

箭頭謝斯洛迪古斯復出
雖然西班牙嗰邊盛傳卻奧斯今場避戰休養生息，上輪鬥馬拉加整親嘅賓施馬亦會被收起，但講真皇馬猛將多的是，首回合即使基斯坦奴朗拿度、加里夫巴利等主將冇份踢，淨係查維亞靴南迪斯同伊拿拉文迪等「副選」都夠殺，加上射手謝斯洛迪古斯有望傷愈復出，為咗重拾比賽狀態勢必搏盡，火力仍然有保證。

另邊廂，哥尼拿喺西盃撞着皇馬只能夠講句唔好彩，首回合擁有主場之利都慘敗1:4，而佢哋近期連丙組都踢唔掂，連續5場未贏過不特止，上場作客鬥巴利阿利斯更輸鑊甘，最後以2:6敗走而回，今場造訪巴拿貝實在不堪設想。

首回合：皇客勝4:1