法達斯維 ：送禮？派蕉？雙紅又出招

踏入12月，英超賽程特別頻密，雖然未到聖誕，但今個周中已經加開快車，粉絲梗係睇得過癮喇，今晚漸入佳境嘅「紅魔」曼聯主場迎戰史篤城，略有起色嘅「紅軍」利物浦作客李斯特城，究竟雙「紅」會繼續派禮物？抑或掟蕉皮跣到球迷攤攤腰呢？睇吓我哋啲名家畀料啦！

「天使」折翼 慢熱冇咁易破城 紅魔宜吼半場和
重上正軌嘅「紅魔」曼聯，今晚聯賽繼續坐鎮主場迎戰史篤城，不過「天使」迪馬利亞因傷缺陣，定必削弱前線火力，面對志切死守嘅史篤城，初段隨時老鼠拉龜冇碇埋手，斯維建議捧半場和。

（now 621周三凌晨3時45分直播）

曼聯上仗主場輕取侯城3蛋，被主帥尹戈爾大讚係佢接手後打得最好之役。不過嗰場波迪馬利亞及隊長朗尼先後受傷「天使」今仗更肯定缺陣，須知「天使」入「魔」後，已交出6次助攻及3個入波，冇咗呢位拚命三郎穿針引線，對「紅魔」進攻影響唔細，曼聯真係唔好咁快開心住。

史篤城強隊「豬頭骨」
史篤城乃正宗豬頭骨，踢法硬淨總令強隊吃苦頭，曾作客擊敗曼城同熱刺，上仗守到尾段先至畀利物浦攻破城池。由於翼鋒域陀摩西斯續抖，預計對曼聯熟到暈嘅領隊曉士會以保守戰術迎敵。曼聯近排用番卡域克拍費蘭尼打雙防中，令傷兵成籮嘅防線不至露晒底，但進攻相對冇季初咁銳利，遇上奮力頑抗嘅史篤城，勢必陷於苦戰。況且「紅魔」近排比較慢熱，唔計上仗大勝侯城，再之前四仗全開半場和，今仗仲冇埋迪馬利亞，初段未必咬得入史篤城，半場和有2.4倍不妨追多鋪。