雷法爾：多蒙特做大騷報答球迷

「歐聯醒神，德甲頭痕」係多蒙特今季最佳寫照，呢支近年非冠即亞嘅德甲勁旅今季聯賽成績大倒退，目前更淪落到自07年以嚟首次成為包尾大幡。好在一眾球迷依然不離不棄，主帥高普亦表明會奮戰到底。今晚「蜜蜂兵團」喺主場鬥賀芬咸，睇番兩軍防守同樣咁曳，就算入球中位數升至3.5都照捧2倍入球大！

（有線61及201台、廣東體育周六凌晨3:30）

「蜜蜂兵團」今季走勢兩極化，聯賽13戰得11分排包尾，相反歐聯演出勇猛，頭4戰全勝提早出線，計落歐聯所得分數（12）比聯賽仲高。球隊總經理華斯基早前指出就算來季缺席歐聯對球會財政影響有限，但降班將會成為一場災難，換言之佢哋今仗回師主場肯定會喪攻搶分！

賀芬咸近3場2次開「7+」
眼見球隊跌落谷底，成班蜜蜂粉依然不離不棄，最近喺西法倫球場掛上「就算你倒下，我仍陪住你」橫額外，日前曉姆斯、根度簡等主力搞活動做侍應招呼粉絲飲啤酒，過千球迷撐場鼓勵球隊振作。Sweet成咁，難怪主帥高普講明唔會辭職咁唔負責任，一眾蜜蜂兵亦會入多兩粒報答球迷啦！

對手賀芬咸經已連續5場比賽至少出現4個入球，當中2仗更開出總入球「7+」。以門將奧利華包文統領嘅防線的確「貢獻良多」，5戰喪失15球，上場呢位慌失失門將更接連判斷出錯導致後防失守，呢條豆腐防線對住聯賽只得1場保住清白身嘅多蒙特，大盤可期！