亨格比利：1.6萬自己友撐場！麥體會W得

世冠盃今日開波，東道主麥靴比體育會同奧克蘭爭入次圈，雖然麥體會係世冠盃新丁，但至少有1.6萬名自己友撐場，加上有去屆賽事銅球獎得主伊亞祖壓陣，要砌低奧克蘭唔難，捧1.4倍主W。

（無綫翡翠台、TVB13及廣東體育周四凌晨3:30直播）

奧克蘭近3屆資格賽止步
話就話係東道主，但麥體會係嚟自得土安，距離今仗地點、即係摩洛哥首都拉巴特足足超過250公里，不過球隊會長艾保安賽前話，佢哋唔係代表摩洛哥北部咁簡單，而係肩負成個國家嘅希望，想班波好似上屆嘅拉查體育會咁殺入決賽！據悉，摩洛哥足總已經為呢場資格賽預留咗1.6萬張飛畀本土球迷，預期麥體會今日實聲勢浩大。

贏波就會躋身8強面對非洲冠軍施迪夫，奧克蘭當然希望過到麥體會呢關，呢支大洋洲代表係就係出席世冠盃次數最多球隊（6次），但佢哋近3屆都喺資格賽止步，證明戰鬥力同各洲冠軍隊伍有明顯距離。上屆喺資格賽為拉查體育會攻入兩球、並喺奧克蘭身上攞到「士哥」嘅射手伊亞祖，今仗會為麥體會上陣，話唔埋又係呢位仁兄剋死奧克蘭。