科娜：歐霸盃死亡遊戲 龍爭虎鬥

最後一輪歐霸盃分組賽，喪玩「死亡遊戲」！G、H、I、K組同樣出現爭出線球隊生死對決，交戰雙方只能活一隊，總之有你冇我，即使上屆冠軍西維爾亦被逼到懸崖邊，形勢緊湊程度不亞於歐聯，到底最終邊隊可以逃出生天，大家拭目以待。

西維爾回勇炒起列積卡
G組上演嘅生死戰由西維爾主場對列積卡，以八分排喺組內第二嘅西維爾今場只要和波就能晉級，反觀克羅地亞球隊列積卡要贏波至得，不過今場作客邊有咁易贏？仲要西維爾近況回勇，一於撐主隊輕取對手晉級！

（周五凌晨4時05分開賽）

西維爾近三仗全勝，當中有兩場均入五球，好大原因係隊中神射手卡路士巴卡重拾射門鞋，呢位哥倫比亞前鋒技術不俗，埋門把握力亦強，後面又有班尼加、馬捷恩佩雷斯、迪路菲奧等能傳擅射嘅攻擊手做支援，卡路士巴卡踢得更加得心應手，可見西維爾嘅攻力非常唔錯。今場關乎出線，而且西維爾話晒都係衞冕冠軍，科娜相信主帥艾美利都唔敢亂嚟，派遣夫添出擊；反觀列積卡傷兵滿營，包括前鋒卡斯坦奴域、中場維丹祖高域同後衞里奧域等主力都因傷上陣成疑，難同西維爾匹敵，讓球主勝捧得過！