科娜 ：飛腳3冠尾關炒起山神

日本天皇盃決賽今日會喺橫濱日產體育場舉行，由新鮮出爐嘅日職冠軍大阪飛腳對住乙組嘅山形山神，飛腳今場唔單止要捧盃咁簡單，仲要完成3冠王霸業，你話班球員又點會因為對手係乙組仔而輕視呢場波吖？今場一於撐飛腳贏波封王，捧讓球主勝！

（有線148台周六下午1時直播）

宇佐美貴史腳風順
對上一次有日職球隊成就3冠王霸業已經要數到2000年嘅鹿島鹿角，可見要達到呢個成就真係唔易，但以大阪飛腳今季嘅表現，絕對值得成為3冠王。飛腳先喺上月初擊敗廣島三箭捧走日聯盃，喺落後兩球嘅劣勢下反勝對手3比2，咁有韌力，抵佢哋封王！跟住再以升班馬身份奪得日職冠軍，堅威水！依家飛腳只差一步，肯定唔敢輕敵，雖然球隊有中場內田裕斗因傷缺陣，不過主力射手宇佐美貴史近排狀態同腳風返晒嚟，絕對唔赦山形山神！

山形山神啱啱喺升班附加賽決賽擊敗千葉市原，升班成功，不過今場對手係對上四次都贏佢哋嘅大阪飛腳，實在難以爆冷，山神今場仲有中場比嘉厚平同後衞西河翔吾養傷，讓球主勝應可穩開。