Yennie ：紅魔回勇復仇 追咬利記殘兵

今晚英超早場上演「雙紅會」，曼聯喺主場恭候利物浦，大家又點可以錯過先？眾所周知，兩軍積怨勁深，曼聯上季慘被「利記」雙殺，連蛋都破唔到，呢啖氣相信一眾「紅魔」到依家都仲頂住頂住喇！不過利物浦今季冇咗蘇亞雷斯，史杜列治又長期養傷，實力已大不如前，曼聯今鋪仲唔有仇報仇，為面子而戰咩！捧1.7倍主勝啦！

英超曼聯又贏一場！「紅魔鬼」雖然仲未踢得番應有嘅霸氣，但總算一口氣連拎15分，一度爬咗修咸頓同阿仙奴頭，過吓「3哥」癮，係，曼聯贏波的確係跌跌撞撞，但「好波不如好運」，踢波除咗技術，運氣同信心都好緊要嘅！

拉爾拉拿打止痛針上陣
季初表現麻麻嘅尹佩斯，近排全面回勇，上仗對「聖人」仲做埋贏波英雄添，只要呢位荷蘭大佬有番自信，相信佢依然係英超數一數二嘅前鋒殺手嚟嘅！不過講到平穩可靠，西班牙三劍俠就最畀到人信心喇，桑馬達、安達靴里拉自開季以嚟一路都有貨交，馬達喺對史篤城射入罰球，靴里拉復出後就交咗2次靚助攻，不過最勁揪嘅，就當然係門將迪基亞啦！呢位鬥牛門神多次「神救」，連續2個月當選官網最佳球員，有佢守護大門，尹佩斯同朗尼可以放心喺前線喪入波，為曼聯報仇啦！

對家利物浦狀態衰到冇朋友，聯賽、歐聯接連失利，上季有份對曼聯入波嘅史杜列治同謝拉特，一個傷一個老，蘇亞雷斯離隊後補入嘅巴洛迪利又冇料到，家陣未喺聯賽開齋不特止，仲成日受傷，今場波又唔使預佢，換句話講，即係又要靠質素有限嘅列基林拔囉！最大鑊係表現叫見得吓人嘅中場拉爾拉拿，喺上周中對李斯特城嗰陣受傷，今晚要打止痛針上陣，又點會有好表現呢？前線鋒力疲弱，防線又有「牛油手」米洛列特「鎮守」，真係撐唔落手囉！

Data King：雙紅會例見「紅」
?謝拉特喺聯賽作客奧脫福取得5個入球，英超史上最多。

?曼聯射手尹佩斯近9場聯賽鬥紅軍入6粒。

?雙紅會歷來喺英超合共出現15面紅牌。