Hot Talk：雙紅名宿 鬧爆 酒吧打吡

今晚英超「雙紅會」真係「有今生、冇來世」！因為好難再睇得番咁爛嘅對賽喇！原本曼聯喺主場招呼利物浦，係英格蘭傳統頂級大戰，可惜兩隊最近踢到唔知似乜，昔日「紅魔」隊長加利尼維利同「紅軍」副隊長加歷查，更形容兩隊碰頭係紅獅隊對狗鴨隊嘅最爛對賽，套用香港術語，即係呢兩隊波渣到好似業餘級別嘅「酒吧界打吡」囉！

雖然曼聯連贏5場，但「紅魔」上星期作客以2:1砌低修咸頓，全場竟然只得3次埋門，係自2003年有相關統計以來，曼聯喺所有賽事中埋門次數最少嘅1次，難怪加利佬做電視直播期間忍唔住喪鬧班師弟：「成隊波冇速度、唔識反擊，肉酸啲講簡直係要乜冇乜，咁都贏到波，等於殺人放火唔使坐監！」

加利佬：紅魔要乜冇乜
雖然話卡域克打番正選後曼聯5戰全勝，尹佩斯又瘋狂入波，但對於加利佬嚟講，依家隊「紅魔」同以前嗰隊真係差好遠，尤其係中前場：「你睇吓佢哋防線前面嗰班人吖，大概值成1億鎊，條鋒線仲值5,000萬鎊添，件件都係大牌巨星，但佢哋嘅傳送成功率，就衰到唔知似乜，好得人驚。」

2011年英國有個調查，發現英格蘭嘅酒吧，普遍都係叫「紅獅」同「狗鴨」，加利佬同加歷查，日前異口同聲話，今晚曼聯對利物浦場波，就好似紅獅隊對狗鴨隊咁，意思係雙方大部分球員都好出名，但水準就似足酒吧界業餘波！有傳媒即刻翻舊帳，發現「紅軍」領隊羅渣士，上任後足足用咗2.15億鎊（約26.23億港元）買24個球員，只係得史杜列治同菲臘比古天奴算物有所值，真係一沉百踩！

酒吧業餘球員寸紅軍冇Heart
咁都未算陰功，利物浦約克郡嘅狗鴨酒吧隊，竟然真係向「紅軍」挑機，其中一位成員、身為愛華頓球迷嘅普勞特話：「睇到利物浦咁嘅環境，堅爽爆，佢哋應該嚟睇下我哋點樣用100%熱情去踢波，我哋每日踢波得4鎊收入咋。」雖然今場「雙紅會」水準唔會太高，但睇吓邊隊出醜，咪一樣咁過癮！

盤路解碼：曼聯近6次主場鬥利物浦贏5場，勝率逾8成。