今季表現大不如前嘅皇家蘇斯達，早排委任前曼聯領隊莫耶斯領軍。雖然莫帥接手後曾保持3場不敗兼零失球，但佢哋喺上周作客維拉利爾，即刻打回原形大敗0:4，今晚佢哋喺主場迎戰畢爾包，就算有地利都冇必勝把握，不如向1.65倍入球細埋手仲穩陣。 （廣東體育周一凌晨4:00直播） 畢爾包復甦靠穩守 莫帥接手皇蘇後踢咗4場波，只得前鋒卡路士韋拿曾經入過波，難怪「莫天才」早前受訪時，都忍唔住要求中後場球員都要幫手進攻，可想而知呢班波鋒力係幾唔掂。查實莫帥除咗「九九八十一斬」之外，真係冇乜進攻板斧，戰術咁單調又點入波呢？ 客軍畢爾包踏入11月開始戰績冒升，主因係防守改善咗唔少，近10場波只係喺歐聯對波圖試過1場失2粒，計落有5仗保持清白之身。睇番佢哋上周中先喺歐聯主場2:0贏咗巴迪，今戰喺客場環境下唔多唔少都會保守啲，入球細值得捧場！