吳紀恩：伊巴謙弗爆 PSG搵甘岡出氣

球壇呂布伊巴謙莫域有邊個唔識吖，而我不知道比奧維是誰啦！查實佢係嚟自法甲甘岡，近期入波停不了，狀態之好同伊巴謙莫域有得揮，今夜上屆法國足總盃冠軍甘岡迎戰聯賽盟主巴黎聖日耳門，兩個人可以同場拗手瓜，但計整體實力，PSG當然高幾班啦，邊隊拎到3分，唔使講喇啩！

（TVB302周一凌晨0:00直播）

比奧維客串副鋒有貨交
比奧維嚟自瓜德羅普，小弟地理麻麻，真係要「孤高」一下先知喺邊度，原來係位處東加勒比海，屬於法國海外省之一，睇落26歲，1米78嘅比奧維平平無奇，論高度身價技術名氣，拍馬都追唔上伊巴謙莫域，之但係呢位右翼鋒，近期串演副鋒效果出奇地好，歐霸盃甘岡贏PAOK出線32強，佢包辦兩球，近3場仲轟入5球，球隊呢排3連勝氣勢咁好都係多得佢咋，喺耶達巴利同文丹尼等掩護下，睇吓比奧維今場可唔可以發揮到後上殺手本色喇。

講狀態，伊巴謙莫域傷愈後一樣咁Fit，包辦PSG近兩場3個入波，而喺法甲上陣9場進帳8球，入球率相當驚人，對面嘅甘岡防線豆腐，17場失30球，輸得最甘係2:7大敗畀鋒力一般嘅尼斯，睇嚟「呂布」今場有機會數番十胡添。PSG喺歐聯1:3輸畀巴塞，終於一嘗輸波滋味，但喺法甲仍然不敗，預計教練白蘭斯會繼續用輪換制，盧卡斯迪治尼、奧里亞、卡比耶及柏斯托尼等隨時候命。

上季對壘，PSG完場前連入兩球贏2:0，而季前喺北京嘅法國冠軍盃交手，佢哋同樣贏兩粒，呢個比數唔通真係咁旺場？