笛子波童 ：愛華頓追打落水狗

昆士柏作客9連敗
英超周二凌晨上演獨腳戲，愛華頓主場迎戰昆士柏流浪（ＱＰＲ）。拖肥糖近期陷入小低潮，聯賽加盃賽已經連續四場未贏過，好彩今場對手係作客九連敗嘅ＱＰＲ，乘着對方首席射手查理柯士甸停賽，拖肥糖可望於主場大勝一仗洗頹風，捧2.1倍讓球主勝。

（now 621周二凌晨4時直播）

愛華頓踏入十二月踢咗四場比賽錄得一和三負，其中輸畀曼城、熱刺同屬作客出戰，上周中歐霸盃就喺穩奪出線權之下出副選不敵俄超卡斯洛達，所以嚴格嚟講只係主場被侯城逼和稍見失準。相反ＱＰＲ今季作客表現「穩定地差」，開季至今連盃賽九場作客全部輸晒，最慘係喺呢九場唯一幫球隊入過兩球嘅士哥拿、今季聯賽入咗八球嘅首席前鋒查理柯士甸於上場對般尼時領紅牌被逐，今仗需要坐波監，對作客已經唔掂嘅ＱＰＲ嚟講更係雪上加霜。

拖肥射手列陣炒得起
有一點值得留意，ＱＰＲ對上四場主場三勝一和，唯一和波對手係曼城，主場發揮同客場差天共地，嚟緊佢哋兩場主場聯賽分別會對護級勁敵西布朗及水晶宮，所以呢兩場先係搶分生死戰，如果唔想再有球員停賽或受傷，今場真係未必同你搏。愛華頓雖然亦有防中巴利停賽，但一眾進攻主力盧卡古、米拿拉斯、巴克里等都可以候命，進攻火力仍然唔講得笑，讓球主客和愛華頓讓一球，推介讓球主勝。