ComboKing：FC悉尼滅鳳重生

澳職今日上演獨腳戲，由FC悉尼主場鬥威靈頓鳳凰。FC悉尼近期雖受傷兵問題困擾，但整體表現未有受太大影響，輸波一仗嘅對手正正係榜首嘅珀斯光輝，今仗回師主場面對狀態反覆嘅鳳凰有望重拾勝軌，阿King捧主W！

（有線64及203周日下午2時直播）

FC悉尼上場作客同墨爾本勝利打和3比3，球隊近期受傷兵問題困擾，繼中場艾希爾菲及前鋒哥利加美路後，另一中場歷克卡利亦因膝部嚴重受傷，成為球隊第3名提早收咧嘅主力。不過，傷兵問題對FC悉尼未有直接影響，球隊近6仗仍取得1勝4和1負嘅戰績，整體表現仍屬理想，今仗主場出擊有望重開勝門。

些路迪炒登地聯冇難度
鳳凰近3仗雖未輸過狀態唔錯，但作客戰績始終麻麻，近4次輸咗3場。鳳凰今仗有中場雲斯利亞因腿筋受傷缺陣，而文尼梅斯卡特上仗踐踏對手雖未被球證發現，但最終被「秋後算帳」判罰停賽2場未能上陣。缺少文尼梅斯卡特呢位踢足鳳凰今季10場聯賽嘅球員，對球隊影響甚大，今仗作客難全身而退。

另外，蘇超些路迪守將梅古及路斯迪因傷倦勤，但剛復出嘅中場占士科利斯極速上力，要贏有前鋒馬里奧比拿迪腿筋傷患未愈難以披甲嘅登地聯兩球應該唔難，捧讓球客勝。（亞視國際台周日晚8時15分直播）而葡超賓菲加已緣盡今屆歐洲賽，可以專心聯賽爭標，球隊近期火力唔錯，遇上包尾嘅基維辛迪有望大勝一仗，讓球主勝及入球大都可取。

（now 676周一凌晨1時直播）