Samvo肥叔：森多主場夠晒甸

意甲球隊森多利亞今季不斷製造驚喜，上輪作客逼和祖雲達斯，令唔少投注者跌晒眼鏡，莊家自然贏到笑。森多利亞嘅評級獲調升，今仗主場對烏甸尼斯，要讓到半一，盤口辣得有道理，上盤仍然值博。

（TVB302周日晚10時直播）

森多利亞唔嘢小，今季主場仍然保持不敗，同祖記及羅馬睇齊，成為僅有3支聯賽主場不敗之師。相反烏甸尼斯表現浮浮沉沉，進攻太依賴老將迪拿達利，防守亦唔穩，近3仗失5球，實力高下立見，受讓都制唔過。

紐卡素「低水」有計
另外，一般投注者買波前，好着重睇球隊軍情、近期成績，但呢啲表面因素對於預測比賽勝負有限，例如今晚英超「東北打吡」紐卡素主場對新特蘭，主隊近況差，3個門將又傷晒，但仍然讓波，理應下盤冇走雞。不過莊家又點會咁益街坊，佢哋每場波都經過深入情報分析，加上精密計算，絕對唔會死錯人。紐卡素頹勢仲要讓平半，睇來上盤低水真係有計。

（now 621周日晚9時30分直播）