Mic少：文仙尼導演國米入球騷

文仙尼重返意甲後，上輪總算取得首場聯賽勝仗，今仗主場對昔日効力過嘅拉素，恃熟賣熟，當然希望再下一城。不過拉素狀態當弗，加上近年食住國米，文仙尼恐怕冇咁易過關。考慮到雙方中前場進攻點多，兼且熟晒對方路數，應會迅速入局駁火，首選入球大。

（TVB 301周一凌晨3時45分直播）

國米上仗贈基爾禾兩蛋，或者係因對手較弱，但畢竟係文仙尼回巢首嘗意甲勝利滋味，對於佢贏取球員信任好重要。預料文帥未來會更加心雄，採取更進取戰術，力爭打返上前列。其實國米中前場不乏猛將，一對前鋒莫路伊卡迪、奧斯華度今季已合共攻入十三個聯賽入球。加上中場新星高華錫亦弗，夠人腳踢進攻足球。文仙尼球員及教練時代都効力過嘅拉素，對呢支首都球隊非常熟悉，亦有助佢制訂破敵方法，國米要入波並唔難。

拉素作客照搏錘
拉素連盃賽連贏三仗，中場老將莫利着晒火，近兩場意甲轟入三球，後衞魯歷不時助攻亦有斬獲，加上已有六球進帳嘅前鋒菲臘佐積域，一條中軸線都有數胡能力，成為佢哋位居前列嘅主因。值得留意係拉素近五次對國米贏咗四次，近四次作客鬥呢支豪門都開出入球大，無懼同對方搏錘，Mic少認為大盤值得跟進。