法達斯維 ：史篤城半場頂得住

強悍特性車仔都買佢怕
今輪英超壓軸好戲，由史篤城主場「守尾門」硬撼一哥車路士。雖然車仔已經畀曼城追到同分，但「寸王」莫連奴一向係「穩陣司機」出名怕死，尤其作客場合必定唔敢冒進，遇上硬淨到暈，最叻踢「爛仔波」嘅史篤城，初段冇交收絕對唔奇，客勝又熱又唔穩，斯維寧願轉玩更好分頭嘅半場和。

（now 621周二凌晨4時直播）

失意軍團不容小覷
每支球隊由不同領隊調教，都會發展出唔同嘅特點，如昆士柏流浪靠主場搵食、史雲斯作客頻頻先入波、韋斯咸角球特別多等，咪睇車路士於聯賽領導群雄，「寸王」主帥莫連奴一向係功利主義者，唔理好醜只求贏波攞3分。就算今季簽入法比加斯令中場組織流暢咗，更釋放埋夏薩特更多參與進攻，但唔好期望車仔場場都好似皇馬、巴塞咁全場喪攻，佢哋可以拖慢節奏，今季作客曼城甚至不惜放下身段，大玩龜縮等機會先至作致命一擊，踢得好唔好睇係次要，最緊要攞到分。

儘管曼城今輪擊敗水晶宮，已經追到同車仔同分，但唔代表車仔今仗一開波就搶，因為史 篤城陣中嘅保贊、高治、查理阿當、蒙尼沙、馬美迪奧夫全屬豪門失意軍人，但湊合成軍後整體戰鬥力強悍，實在難纏，加埋「打仔格」嘅約拿芬禾達斯、馬克威爾遜、尼桑斯、梳爾哥斯，喺領隊曉士凝聚下，迸發出一種打不死精神，今季佢哋已經贏過曼城、熱刺同阿仙奴等勁旅，絕對唔嘢小。

作客初段唔敢冒進
莫連奴深知史篤城係舊難啃豬頭骨，當然穩陣至上，由於門將泰拔高圖爾斯有傷在身上陣成疑，由老將泰利領導嘅防線，演出好壞非常關鍵，呢位隊長今夏就同球隊約滿，梗係要爭取表現博續約。睇番車仔今季8場作客聯賽，只係贏得4場咁大把，勝率僅得50%，成績唔算標青。

今場客勝熱到得嗰1.47倍唔多穩陣，反而斯維留意到呢8仗當中有5場係開出半場和，證明「寸王」每逢作客都唔敢輕舉妄動，而車仔近5次作客史篤城，亦有4次係上半場未分高下，面對有氣有力嘅史篤城血肉長城，初段預咗會陷於苦戰，半場和有2.18倍真係萬勿錯過。