Combo King ：白禮頓內亂富咸踩多腳

英格蘭各級賽事停不了，除咗英超獨腳戲，今晚仲有少量英冠同英甲，一於串埋佢玩過關。富咸喺卡雲農舍球場迎戰白禮頓，白禮頓正值內亂，前利物浦名將希比亞於7日前辭去領隊一職，現時由看守領隊尼敦鍾斯頂住，正所謂蛇無頭不行，白禮頓上仗主場都贏唔到雷丁，今仗作客更加唔使諗，富咸主Ｗ夠穩陣。

（周二凌晨4時開賽）

希比亞執教白禮頓22場聯賽期間，只贏過3仗，最終佢都要迫於無奈辭職，只係執教短短六個月就拜拜，繼利華古遜之後再一次敗走，兩日之後球隊足球部主管亦被班主炒魷，白禮頓依家亂七八糟，看守領隊尼敦鍾斯接手後上仗和雷丁2比2，佢賽後就話自己都唔知頂幾耐，言下之意都係冇乜心機教，頂幾場算數。白禮頓咁嘅士氣，作客點會有機會搶分吖，富咸仲唔趁佢病攞佢命。

班士利早入局捧半場大
英甲兩場亦有好路數，奧咸近況欠佳，上次作客剛吞7蛋，遇上近況不俗的班士利，想作客搶分有難度，不過，兩隊近期早早入局，上半場都不乏入球，半場大可留意。至於伊奧維對奧連特可以吼番上盤，奧連特作客6連敗失13球，今仗唔失波都偷笑，咪講話贏波，伊奧維最近2次主場都淨勝奧連特，今仗食過翻尋味。