格爾芬：殘兵紅軍地莊 點捉天鵝？

「慢速反擊」帶波似擔泥
英超2014煞科戲今晚上演！利物浦上場作客雖以1:0險勝般尼，但場波踢落疲態盡露，一班球員帶波帶到好似擔泥咁，贏到都算好彩。最弊今晚返到主場對住史雲斯，主帥羅渣士可以用嘅球員所餘無幾，焗住繼續用班「殘兵」鬥「天鵝」。利記對住般尼都搞到咁「論盡」，今場讓半一未必讓得起，1.97倍下盤可以一試。

（now621台周二凌晨4:00直播）

「紅軍」喺英超聖誕快車第1擊同阿仙奴激戰100分鐘後，Boxing Day作客鬥般尼疲憊不堪，快速反擊變成「慢速反擊」，進攻一啲威力都冇，唔係史達寧下半場單刀得手，隨時袋少2分。最慘係依家隊波嘅班底，可以供羅帥選擇嘅球員唔多，捱到殘晒嘅史達寧、拉爾拉拿、佐敦軒達臣等可能冇得抖，繼續要上陣搏殺。

「騰雞」米洛列特把關 隨時又蝦碌
至攞命嘅地方仲有後防，近4場正選把關嘅利記門將巴利鍾斯，上場打咗15分鐘就拉傷大腿退下火線，今戰要唔多穩陣嘅米洛列特把守最後一關。呢位比利時國腳上場後備上陣「騰晒雞」，睇佢守龍真係心都跳出嚟，今戰隨時又有「蝦碌」嘢畀球迷睇。

史雲斯反彈 魯迪治 高美斯復出
另邊廂嘅史雲斯近兩戰都成功擊敗對手，走出兩連敗陰影。雖然「天鵝」今戰有中場謝法臣蒙迪路因傷唔出得，但前線嘅魯迪治同巴菲迪比高美斯都傷愈復出，可以候命落場，對住「殘爆紅軍」有望延續連勝強勢，受讓更加抵捧。

Data King：史雲斯連續7場入波
?利物浦近3仗主場全和。

?雙方過去4次交手均開大。

?史雲斯近7仗全部有波入。

乜都玩錦囊：天鵝快入局博「半W」
史雲斯近10場作客好快入局，上半場入咗成9球咁多，近兩仗都成功喺半場取得領先，今仗對手利物浦防守唔多掂，呢場不妨博一博4.95倍嘅「半場客勝」。

盤路解碼
史雲斯射手韋菲特邦尼近4場作客3次開「首球」。