法達斯維：國米求敗撐PSG

至於AC米蘭嘅同市死敵國際米蘭，將會喺摩洛哥舉行嘅熱身賽出戰法甲班霸巴黎聖日耳門（PSG），後者以王牌伊巴謙莫域為首嘅幾名球員倒戈，增加咗場波嘅話題性，國米有求於PSG兼傷兵滿營，喺呢類無關痛癢嘅賽事，隨時順水推舟輸埋唔奇，不妨捧PSG主勝。

（TVB 301周三凌晨3時直播）

雙方關係千絲萬縷，PSG王牌伊巴謙莫域、麥士維同莫達曾効力國米，前兩者不但同剛回巢嘅「藍黑兵團」教頭文仙尼共事，佢哋因為喺09年轉投巴塞，錯過一年後國米榮膺三冠王嘅輝煌，你話唔揼心就假。PSG主帥白蘭斯亦曾喺99-01年効力過國米，不過係佢球員生涯嘅黑暗時期，仲被免費送畀曼聯，今仗以教練身份重遇舊主，梗想威番鋪喇。

文仙尼想借拿維斯
國米高層亦趁住今次「拍跳」機會，順便想斟吓於PSG失寵射手拿維斯過檔，滿足文仙尼買前鋒嘅要求，但資金有限，國米好難使2,500萬歐元買佢返嚟，可能會以先借後買形式促成交易。除咗想借兵之外，睇番國米中場靴蘭尼斯、後衞莊拿芬靴里拉及杜杜全部有傷，左閘長友佑都為日本國家隊備戰亞洲盃缺陣，陣容天殘地缺，依家又有求於人，點都要畀啲誠意，文帥係世界仔應該識做，喺呢類無關痛癢嘅熱身賽無謂硬碰，PSG主勝有1.65倍咪嫌少。