走肖：「阿德」後防穿窿做大龍鳳

2014年大除夕足智彩得1場澳職畀大家玩，阿德萊德聯喺主場對威靈頓鳳凰，玩入球大啱數，原因係阿德萊德聯後防天殘地缺，慘到要搵新仔頂檔，就算鳳凰有王牌射手尼敦般斯被澳洲國家隊徵召備戰亞洲盃缺陣，都夠晒本錢同「阿德」開入球騷。

（有線64及203周三下午4:30直播）

香港球迷之所以熟悉阿德萊德聯，好大程度係因為佢哋嘅教練甘巴爾曾經執教傑志，而且風格進取唔愁有悶場。雖然阿德萊德聯今季表現海鮮好難捉路，不過今場佢哋有後衞泰歷艾列治同保加特停賽，門神隊長加利高域更被澳洲國家隊徵召冇份披甲，相信好難保得住清白之身！

由於唔夠人使，據講甘巴爾決定起用18歲中堅禾蘭特打正選，都咪話唔牙煙！就算中場指揮官卡路斯卡受傷，令「阿德」攻擊力受損、鳳凰射手尼敦般斯又入選澳洲國家隊缺陣，幸好鳳凰另一位前鋒基舒拿近排勁弗，唔難攻破「阿德」防線，1.7倍入球大抵捧！