美斯謙：紅魔咬唔入史篤城 藍月亮勢炒新特蘭

曼市雙雄元旦日分途出擊，其中曼聯作客史篤城隨時又會失分。紅魔上仗狂攻熱刺都入唔到波，最終賽和0比0，除因對手門將洛里斯表現出色外，陣中唔少球員似乎都被快車賽期搞到身心俱疲，表現有啲跌Watt。

紅魔今晚繼續作客踢法更硬淨嘅史篤城，雖然史篤城今仗有翼鋒域陀摩西斯及中場薛維爾缺陣，但曼聯亦有後衞馬高斯盧祖、中場費蘭尼及戴利白蘭特倦勤，以紅魔現時咁嘅人腳再加上一眾球員未必回得切氣，相信好難咬得入史篤城，捧讓球主勝。

（now 621周四晚8時45分直播）

至於曼城上仗喺領先兩球下最終被般尼逼和，失去追近榜首車路士嘅機會之餘，更令一班捧場客失望而回。「藍月亮」今仗續喺主場出戰，雖然有中場費蘭甸奴繼續停賽，前線殺手阿古路及迪斯高仲未好番，但其他球員谷埋一肚氣勢必大踢爭氣波冧番球迷。至於作客嘅新特蘭近兩場都贏唔到，狀態麻麻，面對如狼似虎嘅曼城，今仗預咗做炮灰，讓球主客和就算讓到兩球都照捧讓球主勝。

（now 622周四晚11時直播）