山度士 ：阿仙奴殺得聖起

「搶四」專家經驗贏晒
英超邊隊最叻爭前四？唔使問阿貴就梗係阿仙奴啦！元旦日英超上演爭奪歐聯入場券前哨戰，由第5位嘅阿仙奴作客「四哥」修咸頓，度士認為兵工廠「搶四」經驗太豐富，加上中場老將路斯基傷愈復出，喺關鍵時刻絕對唔會手軟，平手盤當然要力撐阿仙奴啦！

（now 621周四晚11時直播）

重用路斯基有貨交
同上季嘅情況有啲唔同，阿仙奴今季喺聯賽出閘脫腳，早早被「雙藍」甩開成條街，基本上已經宣布同聯賽錦標無緣，因此又係時候啟動「搶四」程式，經過聖誕新年快車一輪搶分後，已經收復番唔少失地，依家已經追到同「四哥」修咸頓同分添，令今仗變成爭前四嘅「六分波」。

可能阿仙奴領隊雲格以前用新仔撞板太多，近年每逢去到關鍵時刻，都會面對現實用番經驗豐富嘅球員，最明顯嘅例子係路斯基，佢季初被雲格投閒置散，但踏入聖誕快車期，呢位34歲老將再次發威，對昆士柏流浪攻入奠勝球兼搏到抽筋，證明自己「廉頗未老」。

修咸頓搏殘未回氣
度士都做過球員，明白到每隊波總要有兩三個老將壓陣，先可穩定軍心，反而修咸頓過往一直都喺中下游掙扎，從未試過好似今季咁去到咁前，有機會「搶四」，缺乏呢方面嘅經驗真係好蝕章，好似上季嘅愛華頓，「拖肥」正正係承受唔到嗰種壓力導致失準，最終被阿仙奴過頭。況且修咸頓上仗迎戰一哥車路士，擺出血肉長城，成個下半場畀車仔圍住嚟砌，幾經辛苦先至守住和局，搏得好盡冇咁快回到氣，另外又有中場核心舒尼達連領紅要坐波監，對「聖人」影響極大，度士認為阿仙奴今仗坐和望贏，平手盤有買趁早。