走肖：「寸王」專恰普捷天奴 車仔起「刺」順番條氣

元旦大家有咩節目？英超今晚有「倫敦打吡戰」陪你過新年。熱刺喺主場迎戰車路士，受讓半一都博唔過，事關熱刺領隊普捷天奴轉戰英超後，3次遇到「寸王」莫連奴全部慘敗，撞啱「車手」最鍾意食「刺」，揀上盤啱數！

（now621台周五凌晨1:30直播）

對賽往績佔先 近兩戰勁入7球
普捷天奴上季登陸英超，帶領修咸頓踢到曉飛，不過兩次對住車路士，主場先輸1:3、作客再吞多3隻蛋，擺明遇「寸王」即收檔。今季普捷天奴轉飯鑊帶領熱刺，氣勢唔及上季修咸頓咁勁，而且上個月嘅首循環賽事，熱刺作客又淨吞3蛋，證明普捷天奴嘅戰術遇親車仔都冇運行囉！

仲有呀，近排熱刺盛傳會有卡塔爾政府資金入主，可能知道賣盤在即，高層已經下令閂水喉執靚盤數，普捷天奴最近口不對心話滿意現時陣容，冇諗過買人，人心惶惶隨時會影響熱刺士氣，就算射手哈利卡尼更弗都冇用。

另邊廂客軍車路士現時只係領先曼城3分，形勢上肯定要搏，而且車仔近6次對熱刺有4勝2和，包括近兩次交手入7球兼冇失波，擺明要打沉倫敦死對頭先肯心息，加上車仔以1:1賽和修咸頓失分後，莫連奴嬲到炮轟球證玩針對，今場梗係要贏波順番條氣啦！