ComboKing：馬賽撲擊蒙彼利埃

盃仔留力出局為今仗
法甲榜首球隊馬賽日前喺法足盃雖然射輸十二碼出局，但球隊喺嗰場波冇出最強陣容，今晚作客中游球隊蒙彼利埃，為咗保住榜首嘅領先優勢，一定會派番晒啲主力出嚟力爭勝利。阿King睇好馬賽今仗可以贏波，讓平半梗要捧上盤。

（TVB 302周六凌晨3時30分直播）

馬賽啱啱喺周中舉行嘅法足盃同低組別球隊格勒諾布爾激戰百二分鐘，結果打成3比3平手，最終射十二碼輸4比5出局。不過佢哋呢場波冇派晒主力出嚟，可見一心為聯賽留力。如無意外馬賽今仗會派番門將文丹達、後衞班捷文文迪等主力上陣，加上現時只領先次席嘅里昂兩分，今仗就算作客都會全力爭勝。

蒙彼利埃喺周中嘅法足盃主場以0比3大敗於巴黎聖日耳門腳下，球隊主將好似前鋒巴里奧斯、中場辛臣同後衞希爾頓等悉數上陣，今仗匆匆再戰榜首嘅馬賽，相信難以交出好成績。其實，蒙彼利埃近期主場成績麻麻，近3仗錄得1和2負之餘竟失了8球，可見球隊防線明顯出現問題，今仗相信凶多吉少，馬賽小讓平半捧上盤。

冷敲利雲特和拉科
其餘賽事方面，西甲利雲特有中場柏巴高尼迪奧普離隊踢非國盃，而拉科魯尼亞中場路爾斯法連拿與盧卡斯佩雷斯皆倦勤，兩軍近況一般，今仗冷敲和波。葡超艾斯杜尼上仗不敵勁旅士砵亭屬非戰之罪，佢哋近3仗主場錄得2勝1和，而且近5次主場鬥摩里倫斯全勝仲只係失1球，今仗值得再追。