張健峰：馬體會「讓客」斬瓜切「塞」

死球煞食 追打落水狗
西甲今晚有場Big3大戰，由巴塞隆拿主場迎戰馬德里體育會。巴塞陣營近期大地震，先係炒咗足球總監蘇比沙列特，其後一代精神支柱佩奧爾亦辭去助理體育總監一職，主力美斯又傳同教頭安歷基不和，雖然會長巴度美奧賽前開腔闢謠，但士氣低落似乎神仙難救，今戰對住狀態大勇嘅馬體會主場都危危乎，一於撐1.89倍「讓球客勝」。

（now632台周一凌晨4:00直播）

巴塞上周聯賽一口氣收起美斯、尼馬同丹尼爾等主力，最終輸波失晒3分，教練安歷基即成眾矢之的，傳聞近兩場唔贏得好好睇睇嘅話，都可以執定包袱。雖然巴塞上周中喺西班牙盃大勝艾爾切5:0，總算重回勝軌，但艾爾切整體實力又點可以同今戰對手馬體會相提並論？誇張啲講安歷基慘成過街老鼠，盛傳同佢不和嘅美斯等主力，到底會搏盡幫佢保住飯碗，定係會借機會送佢一程，就要留番球迷自己判斷喇！

嚟到呢個關鍵時刻，雖然巴塞會長巴度美奧尋日開腔話美斯唔會走，又否認「球王」要求管理層請安歷基食無情雞，但巴塞上下士氣唔好確係鐵一般嘅事實。其實純以實力計，上季西甲終極一戰，巴塞正正係畀馬體會搞到失落錦標，「床單兵團」最煞食嘅死球戰術，偏偏恰死身材矮細嘅巴塞守將，「地上最強」主場都唔係易贏。

巴塞會長開腔難挽士氣
相比起巴塞諸事不順，客軍馬體會就正好相反，「王子」費蘭度托利斯回歸，上周中西盃對皇馬正選披甲雖然冇士哥，但總算領軍贏2:0。「床單兵團」士氣如虹兼死球戰術耍家，上場就係靠一個12碼同角球搞掂皇馬，對住「銀河艦隊」條星級鋒線都保得住清白之身，今戰作客「地上最強」穩守突擊有本錢保住不敗，受讓梗係博「讓球客勝」啦！