走肖：賓帥騷Quali搵後路 拿玻里趁祖買

意甲今晚上演前列大戰，由拿玻里主場迎戰祖雲達斯，前者今季聯賽爭標機會渺茫，教練賓尼迪斯仲因為不滿被高層質疑，堅嬲唔願續約，決定季後走人。為咗搵新老細，賓帥梗係要落柯打做番齣好戲，受讓平半1.76倍下盤有着數！

（TVB301周一凌晨3:45直播）

拿玻里喺意甲重開後以4:1打沉切塞納，除咗希古恩梅開二度，荷西卡利祖同咸錫都有波入，可惜佢哋始終落後祖雲達斯10分，搞到賓尼迪斯成日被人插，前日佢透過經理人放風，宣布今季結束後離隊，又自爆秘魯國家隊斟過佢，只不過佢冇興趣接手啫。

其實最近都有傳過，利物浦諗住搵賓尼迪斯回巢，既然得唔到拿玻里高層信任，佢想走都好正常，呢個時候梗要領軍踢好波，爭取埋新老細碼頭啦，加上新簽入嘅森多利亞前鋒加比亞甸尼可以登場，就算後衞高林要為阿爾及利亞備戰非國盃都冇有怕。

祖記弱勢讓唔起
另一方面，祖雲達斯被國際米蘭逼和1:1後，領先羅馬嘅優勢剩低1分，更重要係近6場只贏得1場，包括衰到喺意超盃加時後以1:2不敵拿玻里，季初嘅強勢冇晒，最慘係守將邦路斯仲要停賽，教頭阿里基焗住要踢番前任主帥干地嘅352陣式，臨急至嚟變陣，真係好難要求佢哋贏波翻身。