Combo King ：射手着火氣勢勁 史雲頓強攻高地

今晚賽事唔多，阿King睇中其中一場直播波，就係英甲高雲地利主場迎戰史雲頓，前者雖然近期甚少輸波，但對手實力麻麻不足為據，遇上「二哥」史雲頓隨時露晒底，就算有得受讓都咪掂，寧願捧番史雲頓上盤。

（TVB 301周二凌晨3時45分直播）

齋睇賽績，高雲地利之前7場聯賽只曾1敗都幾見得人，但再睇真啲，佢哋對住嘅華素爾、費列活特、維爾港、高車士打等均屬中下游球隊，大家半斤八両，「高地」少輸波唔出奇，不過今仗出戰史雲頓就唔同講法。史雲頓貴為聯賽「二哥」，唔單止近8仗贏咗6場氣勢正盛，前鋒安迪威廉斯更喺呢8場轟入7粒，腳風順到冇朋友，加上近4次交手未輸過仲贏咗3次，擺明食住高地喇，作客小讓平半，呢個上盤非常值博。

華歷簡奴反彈添食在望
至於西甲華歷簡奴主場火併科爾多瓦，科爾多瓦有中場盧比斯加雷、前鋒拿比基拿斯、盧素迪加度及後衞保遜上陣成疑，作客又曳，相反華歷簡奴上仗贏波，終止5場不勝嘅悶局，今仗勢必乘勝追擊，主勝咪錯過。最後法乙華倫西恩斯主場對索察，前者有箭頭施加馬利迪亞拉同守將謝路美古荷亞達均要出戰非國盃，攻守實力受削，索察係今季法乙作客王，踢咗8仗未嘗1敗勁sharp醒，仲有得受讓真係不容錯過。