亨格比利：利車射手大鬥法

英聯盃4強首回合
紅軍鋒將翻生 藍戰士孖寶着火
真係講你都唔信，開季表現衰到貼地嘅利物浦，最近大翻身連續8場不敗，今晚佢哋喺英聯盃4強首回合主場硬撼車路士，你話「紅軍」會再下一城咩？我就唔信嘞，不過包括拿沙馬高域在內嘅3位鋒將最近齊齊摷番射門鞋出嚟，「神奇隊長」謝拉特亦會喺今戰復出，對住近期入波當食菜嘅「藍戰士」孖寶奧斯卡杜斯山度士同迪亞高哥斯達，梗係捧2倍入球大啦！

（TVB301、廣東體育周三凌晨3:45直播）

謝拉特 拉爾拉拿 聯賽留力搏今鋪
利物浦近6場英超4勝2和，唔聲唔聲爬番上聯賽榜上游。冇錯，佢哋近期嘅對手當中，只得阿仙奴叫做惡啃啲，唔算話遇到咩大考驗，但利物浦正正需要勝仗嚟打番起球員信心。

就講上場對維拉吖，兩位鋒將波連尼同列基林拔齊齊有波入，一個喺英超開齋，一個就打破近2個月入球荒，連翼鋒拿沙馬高域都踢到生晒，信心返晒嚟，今晚又嚟料絕對唔出奇。

況且「紅軍」主帥羅渣士對今戰勁重視，鬥維拉一戰特登收起謝拉特同拉爾拉拿，擺明係想鍊「車」。大家都知「神奇隊長」好希望轉戰美職前為「紅軍」捧盃，最有機會就係呢隻英聯盃嘞，「謝四」搏埋條老命都同你死過啦！更何況次回合去到史丹福橋聽等劏，今鋪主場出擊必定會爭取士哥。

奧斯卡 「迪哥」 2場夾埋入6球
利物浦要搏命，車路士亦唔係人咁品。呢支英超「一哥」月頭意外大敗畀熱刺後，大軍呢排已經重返正軌，近2場聯賽連殺紐卡素同史雲斯，當中奧斯卡杜斯山度士同迪亞高哥斯達合力轟入6球，加埋夏薩特喺邊線咁大威脅，面對轉玩3人防線嘅利物浦實有大把機會「騷哥利」，今場入波唔慌少啦！

Data King：車仔近5次交手不敗
?雙方近5次交手，車路士錄3勝2和成績。

?「藍戰士」近3仗保持不失球。

?利物浦最近3次主場出擊都開大。