歐冠：多蒙特唔慣征西捧馬體會上盤_東方日報

今晚另一場歐聯8強首回合，馬德里體育會主場鬥多蒙特。馬體會喺鐵帥施蒙尼麾下一向硬淨，主場尤其醒神；多蒙特每逢造訪西甲3巨頭例腳軟，今場凶多吉少，馬體會讓半一照捧上盤。（Now 644周四凌晨3時直播）

鐵帥施蒙尼最叻谷士氣
馬體會今季聯賽冇以往咁穩定，依家唯一爭冠希望得番歐聯，必集中火力專攻呢項，主帥施蒙尼最叻谷行士氣，鬥心唔使懷疑。佢哋主場出擊每每打高兩班波，今屆4次歐聯主場出擊全勝，包括16強次回合主場贏國際米蘭2比1，成功收復首回合輸0比1失地，再憑互射12碼晉級，盡顯韌力。

其實多蒙特打入8強階段都有啲運仔，佢哋分組賽雖然喺死亡之組突圍，但當時AC米蘭同紐卡素一樣陷傷兵潮，益晒「蜜蜂兵團」，16強又抽中實力較弱嘅燕豪芬，8強遇上馬體會先係真正考驗。多蒙特近5次歐聯作客西甲3巨頭皇馬、巴塞同馬體會，只得1和4負，包括2018年歐聯分組賽作客淨吞馬體會雙蛋，明顯唔慣征西，難擋馬體會猛攻。