奧運男足：阿根廷欠銳細盤有着洛_東方日報

阿根廷欠銳細盤有着洛

今晚男奧足Ｂ組首輪焦點戰，阿根廷男奧足硬撼摩洛哥男奧足。雖然「小潘帕斯雄鷹」星味十足，但主帥馬斯真蘭奴冇乜料到，遇上硬淨嘅摩洛哥唔係贏梗，寧捧2.5球入球細。（HOY TV 76台周三晚9時直播）

摩洛哥硬淨頂得兩嘴
隨住連續兩屆盟主巴西於外圍賽出局，死對頭阿根廷男奧足梗係想力爭金牌。佢哋陣容亦算有誠意，3名超齡球員魯利、奧達文迪同祖利安艾華利斯（圖），啱啱先為阿根廷衞冕美洲盃，但匆匆再戰難免有疲態。主帥馬斯真蘭奴兩度為阿根廷贏得奧運金牌，佢踢而優則教，希望成為史上首位以球員及主帥身份奪金嘅人，可惜踢波叻唔代表教波掂，「小潘帕斯雄鷹」近4場熱身賽只得2勝2負，包括日前同畿內亞男奧足「拍跳」竟然輸0比1，認真失威。

摩洛哥男奧足並非善男信女，3名超齡球員包括蒙尼亞莫漢特、隊長阿舒拉夫同蘇菲安拉希美，前兩者係摩洛哥喺2022年世盃奪得殿軍嘅功臣，加上阿舒拉夫踢緊巴黎聖日耳門，熟晒地頭。翻查紀錄，阿根廷男奧足上屆3場分組賽入得兩粒，全開2球或以下，只得第3名提早畢業，咁慢熱捧入球細好過。文:法達斯維