科娜：搶6大戰獅吼殺手

布里斯班獅吼近年雄霸澳職，喺11、12同14年三度成為澳職總冠軍，但今季出閘脫腳，頭4戰全敗，相信好多捧場客都畀獅吼搞到損手爛腳，好在呢隊波近排狀態有起色，升到第7位，依家力爭殺入前6，攞季後賽資格。同樣要爭上前6嘅仲有中岸水手，今場會喺主場同獅吼上演關鍵大戰，獅吼多名傷兵已傷愈回歸，作客水手有力贏波而回，平手盤要獅吼！

（有線64及203台周五下午4時40分直播）

雨後有彩虹，呢個道理雖然勁Outdated，卻係真理，獅吼捱過季初低潮期後，近期終於見到曙光，近兩場全取6分，同第6位嘅墨爾本城只差1分，加上中場指揮官布萊治傷愈回歸，為球隊射入7球嘅巴西射手軒歷基安達迪今場亦有望傷愈復出，仲有新兵普蘭斯，令球隊實力更上一層樓。

中岸水手有亞冠盃後顧
中岸水手比獅吼打多1場但少3分，形勢不妙，今場又有中場李察華尼斯因傷缺陣，前鋒米歇爾杜基亦改投清水心跳，此消彼長下，實力同獅吼有一定距離，而且球隊幾日後會喺亞冠盃迎戰廣州富力（足智彩譯音：廣州RF），由於到時係一場過定生死，今場或有後顧之憂，隨時畀獅吼乘虛而入，平手盤一於揀獅吼喇！