黃興桂：弱旅入決賽球迷最唔Like

是日金句都幾得意，點解咁講？英格蘭國內兩大盃賽係聯賽盃及足總盃，Peter將於過完農曆新年後，同一班本地球迷遠赴溫布萊球場，欣賞聯賽盃決賽車路士對熱刺，由於戲碼強勁，令呢場大戰嘅波飛非常渴市，如果依家要買飛，一張差唔多要400鎊（約4,775港元）先有得諗。現時英足盃仲有曼聯、利物浦、阿仙奴等強隊，始終英足盃歷史悠久，地位喺聯賽盃之上，若果決賽組合包括上述3隊，到時啲波飛可能仲貴添！但點都要視乎最終係乜嘢戲碼，始終球迷都係鍾意睇兩強對碰，假如失驚無神畀隊英冠仔入決賽，不但球迷唔Like，啲波飛亦隨時跌到兩、三百鎊就有交易。

雙「西」大戰和味濃
講番今晚嘅16強，戲碼唔算勁，其中西布朗（West Bromwich）主場火併韋斯咸（West Ham United），兩個West字頭正面交鋒真係冇乜高低，我估係打和要重賽。唯一贏面較高嘅係英冠3哥打比郡，佢哋喺主場硬撼同級嘅雷丁，打比郡喺前英格蘭領隊麥卡倫帶領下，下季有望重返英超，相信可擊敗雷丁晉級。

金句：
盃係要嚟畀球隊爭，戲碼係出嚟畀fans睇。