走肖 ：西布朗搏錘冇優細

醉駕射手失正選
西布朗今晚喺英足盃16強主場對韋斯咸，未必多波入，事關西布朗射手比拉希奴近排受到醉駕事件影響，心情麻麻，加上韋斯咸有中鋒安祖卡路爾再傷，唔似有本錢駁火，玩1.68倍入球細好過。

（now621及633台周六晚8:45直播）

上星期西布朗喺英超主場以2:0砌低史雲斯，走勢其實唔錯，射手比拉希奴重返正選陣容更加有波入，不過上個月佢衰醉駕，被停牌1年兼罰款，為咗對佢作出懲罰，最近西布朗並唔係每場都畀佢打正選，免得畀人話佢醉駕都冇事，有可能影響佢作戰心情，要再入波唔容易。

安祖卡路爾傷膝唔踢得
另一方面，韋斯咸上星期喺聯賽作客以0:0打和修咸頓，近排入波已經唔多，點知中鋒安祖卡路爾後備入替後整傷膝部舊患，呢場唔使預佢。要知道韋斯咸領隊艾拿戴斯知道隊波火力唔夠，最近已嗌救命話想簽被曼聯外借到皇家馬德里嘅查維亞靴南迪斯，咁嘅身世唔慌多波入啦！