阿占：漢諾威變陣強攻柏達邦

今季德甲護級形勢緊湊，就算依家排喺中游嘅球隊都未可安枕，好似今晚主場出擊嘅漢諾威，歇冬之後3場聯賽只拎得1分，距離降班區只不過係兩場波左右距離，再唔搶分就可能萬劫不復，好在佢哋今晚主場只係對住狀態同實力更差嘅柏達邦，據報漢諾威今場會轉陣加強鋒力，拎3分決心相當鮮明，3倍「讓球主勝」在望！

（有線61、64、201及203周一凌晨0:30直播）

漢諾威本身實力唔差，歇冬期間更簽入葡萄牙翼鋒荷奧彭利拿增強實力，雖然近3場聯賽只得1和2負，不過今場佢哋會改踢「4-2-3-1」陣式，由呢季射入7球嘅祖斯盧辛馬田做單箭頭，後面就安排清武弘嗣、科恩特同史甸度協助攻堅，呢個組合創造力肯定足夠。事實上漢諾威今季9場主場聯賽贏咗5場，失分嘅都係對住禾夫斯堡同利華古遜等前列分子，今場贏面應該好高。

柏達邦近4場聯賽交白卷
作客嘅柏達邦係今季德甲降班熱門，講真佢哋嘅實力真係比其他球隊低一班，對上一次聯賽贏波已經係上年11月初嘅事，近4場聯賽更加全部交白卷，可以話係攻不銳、守不穩，最慘係兩大主力杜基斯治同馬里奧維蘭斯都受傷患困擾，令隊波戰力進一步削弱，今場作客梗係凶多吉少啦。

頂占筍盤：漢諾威（讓球主勝）