英超：葉士域治夠硬淨細守紅軍_東方日報

英超「1哥」利物浦周六強勢出擊，喺晏菲路球場迎戰護級分子葉士域治，睇牌面兩隊一個天一個地，不過「紅軍」近期連場惡戰下稍現疲態，對住踢法硬淨嘅葉士域治未必可以予取予攜，只求贏波似係「小勝格」，博3.5球入球細方為上算。（Now 622周六晚11時直播）文:工廠仔

利物浦依家仲喺4條戰線作戰，球員衝完一輪，近期銳氣減弱，領隊施洛亦深明留放之道，唔會夾硬要班疲兵繼續唔錫力搶攻，王牌前鋒穆罕默德沙拿近4場只入1球，對上2場聯賽入波都出現困難，對森林要喺下半場靠後備奇兵追和，上場聯賽更等到補時先由達雲紐尼斯連入2球，2仗總入球都開3球或以下。

鬥勁旅頂得兩嘴
唔好睇葉士域治排尾3就當佢係「魚腩」，呢支由基蘭麥堅拿領導嘅年輕球隊，今季面對依家排前4名嘅勁旅（利物浦、阿仙奴、諾定咸森林、車路士）都有板有眼，表現絕非不堪一擊，當中包括擊敗過車路士，而且4場總入球全開3球或以下。葉士域治今仗專心防守，有力為利物浦製造重大阻力，3.5球入球細值博。