英足盃：曼聯後防兩大問題等艾摩廉解決_東方日報

今晚英格蘭足總盃「英超對決」，曼聯主場同富咸爭晉級。雙方都想喺盃賽大展拳腳，特別係富咸今季得番英足盃可爭，遇上狀態不穩嘅「紅魔鬼」必定加多兩錢肉緊，可以預期戰況激烈。

奧拿拿近期頻犯錯
曼聯今屆英足盃衞冕之旅驚險萬分，先後淘汰阿仙奴及李斯特城，今圈又抽中英超對手，只能慨嘆「冇籤運」。「紅魔鬼」上周中聯賽以3比2險勝葉士域治，不過有新左閘柏德列多古領紅要停賽，主帥魯賓艾摩廉眼前有兩大問題要解決，除咗左路防守點安排外，仲要諗諗門將奧拿拿近期頻頻失誤嘅問題，加上上場對葉士域治有半場時間踢少個，球員體能能否及時恢復，亦係關鍵所在。

對比曼聯，富咸晉級過程易得多，上圈輕鬆淘汰英甲韋根，上周中聯賽憑翼衞賴恩施斯隆及前鋒洛迪高梅尼斯建功，以2比1擊敗狼隊，近期聯賽作客3連勝，氣勢正盛。今晚踩入奥脫福，相信主帥馬高施華會作出戰術調整，箭頭魯爾占美尼斯及翼鋒伊禾比預料會擔正，不過佢哋近年對曼聯成績差強人意，今場可唔可以打破宿命，就要靠落場球員努力。