歐聯：多蒙特搶攻大盤明益里_東方日報

歐聯16強首回合另一場尾場，多蒙特主場迎戰里爾，上屆亞軍多蒙特大賽經驗佔優，加上配合地利優勢，相信會採取主攻戰術，力爭贏波提升晉級機會。法甲球隊里爾演出令人驚喜，今屆曾擊敗「馬德里雙雄」，無懼同對手駁火。考慮到多蒙特近6場歐聯有5次總入球開3球或以上，首選中位數2.5球嘅入球大。（Now 639周三凌晨4時直播）文:Mic少

多蒙特新帥尼高高華曾經執教拜仁慕尼黑、摩納哥等球會，領軍經驗豐富，協助「蜜蜂兵團」喺附加賽淘汰士砵亭，呢位克羅地亞名帥戰術思維進取，傾向先下手為強，加上射手古拉斯狀態大勇，近2場有5球進帳，要攻入里爾大門，並唔困難。

里爾氣勢勁鬥開火
里爾以「聯賽階段」前8位直接晉級16強，期間擊敗兩支西甲勁旅皇馬及馬體會，可見即使遇上傳統名牌球隊，亦毫無懼色。里爾曾經大勝另一支歐聯16強分子飛燕諾6比1，作客雖然不敵利物浦，亦能取得入球。由於多蒙特防線並唔穩陣，里爾入波機會相當高，捧入球大啱數。