歐霸盃：召入彭馬如虎添翼 車仔搶Ｗ斬草除根_東方日報

歐協聯16強首回合，哥本哈根主場迎戰車路士。兩軍實力有一定距離，車路士於「聯賽階段」以全勝姿態殺入16強，球隊今季得番歐協聯同聯賽前4可爭，今場肯定搏命，加上佢哋近3次歐洲賽作客丹麥兵全勝，熱捧客勝。

（Now 639周五凌晨1時45分直播）文:臻贏特

無獨有偶，兩軍嘅隊徽都係「藍獅」，不過雙方喺晉級過程就好大分別；哥本哈根「聯賽階段」6戰2勝2和2負排18位，附加賽對住德甲包尾嘅海登咸，主場先輸1比2，作客法定時間以同樣比數贏波，幾經辛苦先至憑加時入波淘汰對手嚟到16強。相反，車路士表現大超班，6戰全勝，以頭號種子之名直接殺入淘汰賽。

車路士喺淘汰賽隆重其事，更新咗畀歐洲足協嘅大軍名單，加番高爾彭馬、杜利奧查洛巴及19歲新星阿莫古。不過「殺雞焉用牛刀」，相信高爾彭馬今場未必會做正選，起用柏度尼圖、尼干古同查頓辛祖都夠殺；事實上，車路士過去3次歐洲賽作客丹麥球隊全勝，而且1球不失，當中包括2次鬥今仗對手哥本哈根。

哥本哈根歐戰未夠班
哥本哈根紙上賽績幾靚仔，近12場正式賽事只係輸過2場，但偏偏呢2場敗仗就係歐協聯賽事，「門口狗」特徵明顯，喺丹麥國內就蝦蝦霸霸，踢歐洲賽實力就差一皮。而且車路士已經喺足總盃出局，上周又冇賽事，抖足9日嚟應付今場，體力及實力都凌駕哥本哈根，客勝必捧。