英超：傷疲困擾 紅魔鬼神仙難救_東方日報

曼聯主場迎戰阿仙奴上演「仙魔戰」，兩軍繼足總盃之後再次交手，目前排喺聯賽次席嘅「兵工廠」，相信今場唔會放生排喺聯賽下半版嘅「紅魔鬼」，加上曼聯人腳不整，今場形勢唔樂觀。文:謝德謙

「紅魔鬼」近期征戰頻頻，先於足總盃互射12碼出局，周中歐霸作客皇家蘇斯達打和1比1，而且比阿仙奴少一日休息，體能消耗絕對係主帥艾摩廉今仗一大難題，一大堆傷兵無法上陣，陣容本已不整，而且左閘杜古仍然停賽，相信艾摩廉今場神仙難救。射手海倫在今年仍然食白果，唯有寄望門將奥拿拿今場演出神勇不致多失。

奧迪加特弗到漏
「兵工廠」上周歐聯7比1作客大炒燕豪芬刷新多項紀錄，隊長中場馬田奧迪加特演出神勇，梅開二度兼交出助攻協助球隊輕鬆取勝。「兵工廠」近兩仗聯賽失5分，今場要取勝才可保持爭標希望，主帥阿迪達當然希望全取3分，唯有寄望前線唔好再度啞火，周中前中後三線都取得入波，相信阿迪達會食過翻尋味。「兵工廠」近4次聯賽交手都取勝，估計今場有望反客為主，全取3分。