亞冠：水手迎海港做細界_東方日報

亞冠精英盃16強次回合，橫濱水手帶住1比0領先優勢，返主場再鬥上海海港。水手防守密不透風，近5場亞冠全部保持不失，當中4場開2球或以下，今場推介3.5球入球細。（HOY TV 76台周二晚6時直播）文:渡邊年

上海海港實力同橫濱水手差咁一截，首回合即使主場應戰，不論控球率、射門次數及命中目標數字，都遠遠不及水手，今場作客相信只能夠盡做，守好再伺機偷襲。橫濱水手由於已經領先上海海港，今場絕對可以歎慢板，佢哋今季亞冠除咗首場輸波，之後7場贏晒，仲要全部0失球，海港要入波都好難，推介入球細。

希拉爾強攻捧半勝
夜啲開波仲有場希拉爾對柏克塔哥。希拉爾首回合落後0比1，次回合為收復失地，勢必展開狂風暴雨攻勢，力爭反勝晉級，球隊近4場亞冠盃主場出擊，全部半場領先，恐怕柏克塔哥上半場都守唔住，1.39倍半場主勝係變倍器最佳選擇。（周三凌晨4時開賽）