澳職：墨城夠硬淨細鍊噴射機_東方日報

澳職獨腳戲，墨爾本城對紐卡素噴射機。墨爾本城被稱為「澳職曼城」，係聯賽中少數打傳控球隊，尤其係當佢哋取得入球後，利用搓傳控制比賽節奏，既可慳力，而且控球在腳令對手難以威脅，乃係最好防守，因此經常1球起、2球止，近6場有5次開2球或以下，加上近4次對噴射機全開2球或以下，預計入球唔會多，2.5球入球細穩陣。（無綫myTV Super周三下午4時直播）文:邪神

「澳職曼城」防線穩陣
話墨爾本城係「澳職曼城」，其實兩隊真係有啲關係，佢哋同樣係城市足球集團旗下球隊，曼城係龍頭，墨城雖然只係跟車尾，但好多嘢都以曼城為師，例如控傳踢法，甚至連件波衫都幾乎一樣；講番踢法，墨爾本城玩控傳，兩、三季前曾經稱霸澳職，不過近年退居二線，主要原因係欠缺數胡人物，攻力下降，不過防線仍然硬淨，現時係澳職失波最少球隊，旺開入球細之餘，近4場有3場贏波兼保持不失，包括上輪輕取FC麥克阿瑟2比0。

紐卡素噴射機近6場3勝3和未輸過，狀態甚佳，不過作客表現稍弱，近5場作客僅2勝1和2負，今場造訪回勇嘅墨城，可算係兩強交鋒，相信作客嘅噴射機不敢冒進，而墨城則守強於攻，雙方纏鬥一輪，入球偏少係意料中事。