西甲：表現硬淨遇強不屈 奧沙辛拿細盤起塞_東方日報

西甲補賽，巴塞隆拿主場對奧沙辛拿，雙方實力有距離，理論上榜首巴塞隆拿勝算高，但考慮到隊內多位主力近日四圍飛出戰國際賽，經過舟車勞頓，難免影響體力，加上周日晚又有賽事，今仗唔可以搏得太盡，預料小勝居多，不過主Ｗ太熱冇肉食。參考兩隊近6次交鋒，有5次總入球開3球或以下，寧願博中位數3.5球嘅入球細。（Now 632周五凌晨4時直播）文:Mic少

今場原本安排3月9日凌晨進行，但因為賽前巴塞軍醫米拿路突然猝死，兩隊同意延期至今晚舉行，對於巴塞隆拿而言甚為不利，因為隊內多位主力剛踢完國際賽，射手拉芬夏比洛尼更加遠赴南美洲為巴西出戰世盃外圍賽，剛於周三惡鬥完阿根廷，恐怕今場未必上陣，削弱鋒線實力。

巴塞中堅受傷求穩陣
此外，兩位中堅恩尼高馬天尼斯、古巴斯有傷在身上陣成疑，教練費歷克可能採取比較穩陣戰術，以免防線承受太大壓力。值得留意，巴塞隆拿踢完今場補賽後，隨即將於星期日晚主場對基羅納，因此預計今場只會勒住踢，只要贏波攞3分已足夠，唔需要浪費體力大勝。

至於奧沙辛拿近5場聯賽僅3和2負，但表現硬淨，包括打和皇馬1比1，加上季初贏過巴塞隆拿，亦有助提升今場搶分信心；睇番奧沙辛拿近2次聯賽作客巴塞隆拿，都係僅負0比1，入球細值得捧場。

耶馬雲達華治隔空互寸

西班牙新星拉明耶馬過去一年極速上位，17歲已經係巴塞隆拿同西班牙嘅靈魂人物，日前歐國聯對荷蘭，耶馬就同荷蘭名宿雲達華治「開戰」，曾效力皇馬嘅雲達華治就寄語呢位超新星，小心自視過高「犯眾憎」。

西班牙喺歐國聯8強首回合打和荷蘭後，雲達華治批評耶馬比賽態度差，結果次回合耶馬加時入波，最後帶領西班牙射贏12碼出線。耶馬入波後一度拉低條波褲慶祝，賽後佢就貼上呢張慶祝相，配上雲達華治頭像，明顯係反擊呢位荷蘭名宿。

小心自大犯眾憎
雲達華治近日就「懶好心」回應：「我會建議耶馬，唔好太在意一個前度球員嘅說話。喺17歲就受到萬般寵愛，你會覺得世界圍住你轉，但呢個唔係事實。足球充滿樂趣，但唔係世上最重要嘅事，如果你覺得自己係神，你就會開始犯眾憎。」