英超：利物浦睇定出招歎細界_東方日報

今晚英超頭場之一，「一哥」利物浦作客硬撼富咸。「紅軍」當務之急係保住聯賽冠軍，不過王牌穆罕默德沙拿近期腳風唔順，既然仲甩開成條街，今仗造訪唔易啃嘅富咸，梗係求穩睇定先食，捧2.5球入球細最划算。（Now 621及611周日晚9時直播）文:法達斯維

季初順風順水嘅利物浦，嚟到衝刺階段終於受到考驗，喺上月中嘅1周內，先喺歐聯16強出局，再於英聯盃決賽輸畀紐卡素，打擊甚大。好彩有國際賽期隔一隔，去到上周中快車兼「默郡打吡」，「紅軍」幾經辛苦險勝愛華頓1比0，不過射手穆罕默德沙拿近6場有5仗食白果，火力跌Watt，主帥施洛惟有務實地打穩陣波，悶悶地贏擸3分。

豬頭骨富咸唔易啃
富咸雖然上周中快車不敵阿仙奴，但表現不落下風，佢哋係正宗「豬頭骨」，特別喺主場經常遇強愈強，阿仙奴、諾定咸森林、熱刺、紐卡素等造訪此地，全部都失分而回，單計近4場聯賽主場出擊，有3次開2球或以下，足見防守非常硬淨。睇番「紅軍」近6場聯賽客場，亦有4次係1球起、2球止，預計佢哋今仗都係小勝居多，2.5球細盤捧得過。