歐聯：迪布尼唔爭氣獻最悶曼市打吡_東方日報

冇腳好波藍月紅魔「窿窿」收場
備受期待嘅英超「曼市打吡」喺周一凌晨上演，惟戰況不似預期，曼聯主場同曼城合演悶戰，結果踢成0比0收場，更被堅尼、加利尼維利等名宿批評兩隊踢出史上最低水平打呲。其中最後一次出席「曼市打吡」奇雲迪布尼亦冇腳好波，交出近7年來最差數據，真係冇眼睇。

曼市雙雄今季成績低落，曼城喺艾寧夏蘭特受傷下，攻力大受削弱，今場作客奧脫福製造機會極少，射門唔係冇力就係角度太正，相比之下曼聯雖然只有2次中目標攻門，但約舒亞舒克斯尾段近門狂抽幾乎得米，幸艾達臣摩拉斯神勇撲出，最後悶和0比0。

近７年首次零次創造機會
曼城今場預期入球（xG）只得0.49，係哥迪奧拿執教曼城以來，喺英超第4低嘅數字。日前宣布季尾離隊嘅奇雲迪布尼，今場最後一次亮相「曼市打吡」，但全場0次創造機會，係佢7年來首次英超踢足90分鐘而未有創造機會，只得69％嘅傳球成功率亦係今季個人新低。

英超名宿堅尼賽後批評：「呢場係水平好低嘅友好打吡。」加利尼維利亦話：「我睇唔到兩隊有任何球員對0比0覺得失望。曼市打吡應該係用血性、怒火、冒險同勇氣去爭勝，依家見兩隊球員賽後拍晒膊頭，好似要約埋一齊晚餐去ＢＢＱ咁樣。」曼聯領隊魯賓艾摩廉亦承認今場水平唔高，但對於加利仔嘅批評，佢就回應：「佢乜都鬧架啦！」

魔迷辱科頓母親哥帥直斥冇品
值得一提，今仗戰情平淡，但部分主場嘅「魔迷」就勁惹火，喺比賽期間「唱衰」菲爾科頓，內容更直接侮辱科爾母親係「蕩婦」，賽後哥帥扯晒火︰「非常冇品！唔關曼聯事，係嗰班球迷。老實講，我唔明嗰班拖埋科頓阿媽落水嘅人諗乜，呢啲行為極度冇品，佢哋應該覺得羞恥。」