兵工廠贏多“倫”

揸住三個作客入球在手，今晚又在自己地頭出戰，阿仙奴要殺入歐冠分組賽應該毫無懸念。當然，世事無絕對，話唔定班“槍手”突然啞火，對手費倫巴治班球員又突然“超人”上身，在酋長球場上演驚天絕地大反擊。

講吓啫！阿仙奴呢兩場踢到完全識飛，首回合亦以技術性擊倒對手，費倫巴治實在難以翻身，只望盡最大努力，一於對攻博一博；不過，防線可能造成更多漏洞，隨時又輸兩三球以上，初盤阿仙奴讓一球／球半，繼續捧兵工廠再勝一“倫”。

阿仙奴近兩場踢得特別醒，可能與聯賽首戰輸波，“雲老闆”應該有“插”冇讚有關，呢班“友仔”仲唔生生性性。事實上，呢兩場的確踢得有板有眼，進攻極具侵略性，防守意識亦有明顯加強，球隊目前士氣十足，只要唔走樣，應可再一次大勝對手。

費倫巴治上周主場根本毫無優勢，被兵工廠壓住打，阿仙奴共有十四次攻門十中目標，輸三球算輸得少，球隊明顯輸體能，原因正選十一個球員中，只有杜普爾與莫沙蘇禾係三十歲以下，與阿仙奴班後生仔鬥攻鬥搶肯定輸蝕，預料今仗捱打居多。

推介：阿仙奴3:0