曼城再遇“虎”戰

曼城第一場係威係勢，大炒“紐記”四蛋，擺出強勢爭標姿態，點知得三分鐘熱度，第二場作客對住一支超過五十年未踢過最高級別聯賽的升班馬，竟然輸波收場，領隊“柏哥”畀呢盆冷水潑到“透心涼”。

今晚曼城再戰另一支升班馬侯城，“柏哥”真係唔可以再衰，否則好自為知。但話時話，真係唔好睇小“老虎仔”侯城，首戰對“車仔”確實踢得唔差，有段時間更壓住“車仔”嚟打，球隊控球能力相當不俗，球員又踢得放，對住強手根本毫不畏懼，憑住鬥心及拼勁，有力與曼城抗衡到底。就算輸，亦未必慘敗收場，初盤曼城硬讓兩球，推介侯城贏盤。

曼城後防真係需要大檢討，季前熱身賽對AC米蘭、拜仁及阿仙奴三場波共失八球，防線已經出現唔少問題，但估唔到對住一支攻力平凡的卡迪夫城可以連失三球，其實並非高柏尼缺陣問題，最主要係“柏哥”佈陣形式，再唔改善的話，攻力點強都補唔返，“柏哥”千祈唔好再貪勝不知輸。

侯城唔單止爛打，踢法更加似模似樣，比波走位完全有紋有路；當然，計球員份量、質素、整體戰力明顯不及曼城，但侯城作戰鬥心值得捧場。推介：曼城2:1