英超爭持夠激烈

英超爭持夠激烈

唔經唔覺英超已經踢咗七輪，暫時嚟講都鬥得幾激烈，前十位只有五、六分之差，唔同西甲又係得兩三隊彈出，更值得開心係阿仙奴與利物浦球迷，兩隊今季都有復甦跡象，暫時排聯賽榜頭兩位；當然，路遙知馬力，聯賽屬於長途賽，可唔可以捱到尾仲係言之過早，但始終覺得兩隊仍未具冠軍相，阿仙奴剛剛在中下游球隊失分，整場表現平凡到極，發揮仍欠缺穩定性，至於紅軍利物浦，睇來睇去呢班人腳都係未有足夠能力捧盃，的確唔睇好兩隊可以笑到最後。

曼市雙雄被譽為奪標熱門，可惜起步脫腳，尤其衛冕的曼聯，前七場只得三勝一和三負，已經失十分，餘下比賽都要步步為營。

曼城就要睇後勁，記得早兩季後來居上反壓曼聯嗎？今季就要睇“柏蛇”韌力。“車仔”係我心目中頂頭大熱，除球隊有爭標實力外，“寸王”摩連奴係真有料，只要繼續咬住前列位置，“車仔”大有機會封王。

以為黑馬的熱刺今季有所發圍，點知上場大失水準，竟然主場三球大敗韋斯咸腳下，即時扣晒分。目前前四爆支修咸頓出來，相信只係剎那光輝，應該唔會企得耐。