曼聯回勇大炒諾域治 紅魔鬼返嚟嘞！喺歐聯同聯賽兩連勝嘅曼聯，噚日朝對住諾域治雖然作出9個調動，但照樣大炒對手4:0晉級，其中「小豆」查維亞靴南迪斯又發威，個人入咗兩粒。 對比上場鬥史篤城，曼聯領隊莫耶斯一共作出9個調動，連迪加特、里奧、維迪、贊奴沙以及小豆等都有正選，而韋費特沙夏就首次獲得落場機會；雖然全部係副選，但接戰後曼聯佔盡上風，上半場小豆前憑12碼開紀錄，換邊後呢位墨西哥前鋒再入一球，加埋菲爾鍾斯同法比奧各入1粒，曼聯終以4:0大勝，今季首次喺各項比賽連贏3場。 除咗車仔阿仙奴同曼聯諾域治，英聯盃噚日朝仲有多場比賽上演，其中最大冷門係李斯特城主場4:3淘汰富咸，但史篤城同韋斯咸兩支英超球隊，就先後淘汰伯明翰同般尼晉級。