阿仙奴博和“坡”

阿仙奴博和“坡”

歐冠盃F組形勢都幾微妙，雖然阿仙奴有十二分暫列榜首，但仍未坐定粒六穩入十六強，如果今晚不幸以三球敗於拿坡里腳下，另一場多蒙特又戰勝馬賽，兵工廠就會功敗垂成。當然，以兵工廠今季強勢要淨輸三球，相信可能性唔大，對手拿坡里必定盡地一煲，肯定由頭攻到落尾，如無意外，雲格應採取穩守突擊打法，和波以首名出線，一於加強中後場防守力，最緊要保住不失。初盤拿坡里讓平手／半球，推介阿仙奴和波合“里”。

拿坡里近況實在踢得比較沉，近五戰只得一勝一和三負，上場聯賽主場亦被烏甸尼斯逼和三比三。攻力仍可以，可惜前線入幾多，後防失幾多，五場波共失十二球，教練肥賓確要在防線諗諗計。尤其今仗對住行軍快速、反擊極具效率嘅阿仙奴，後防要保住不失相信亦比較困難。

打完愛華頓之後，阿仙奴展開恐怖賽程，今晚作客拿坡里後，過兩日就要硬撼曼城，跟住再與車仔進行倫敦打吡大戰，連場惡戰確受到極大考驗；不過唔到雲格諗太多，最重要先殺入歐冠十六強，今戰定會頑強應戰到底。

推介：和波1：1