再捧熱刺爆“廠”

再捧熱刺爆“廠”

英超今個周末暫停戰火，不過列強依然冇得唞，因為輪到足總盃開戰。今晚重頭戲係倫敦雙雄對陣，阿仙奴激鬥熱刺，雙方在聯賽首循環碰頭，阿仙奴雖然贏波，但形勢上熱刺稍佔優勢。目前經過執手尾嘅舒活改變踢法後，調動更顯靈活及積極，今仗再戰兵工廠，熱刺絕對輸唔晒。初盤阿仙奴讓半球，不妨考慮熱刺可以全身而退。

睇返兩隊周中在聯賽表現，阿仙奴完埸前兩分鐘才能擊敗卡迪夫城，的確贏得驚濤駭浪。好明顯，兩大進攻核心奧斯爾與基奧特缺陣，前線至少冇咗三成“攻”力，始終久休復出嘅普度斯基未有十足狀態。

反觀熱刺擊敗曼聯贏得相當精彩，球隊穩守突擊打法非常湊效，每次攻門吓吓到肉，唯一可惜艾迪拜約今仗可能因傷缺陣。不過，迪科爾亦具一定埋門把握力，拍住蘇達度一樣有贏波本錢。

無可否認，熱刺今季踢作客發揮無疑比主場更佳，能夠在奧脫福殺低曼聯，士氣肯定提升唔少。況且踢淘汰賽都算係強項，進取心亦比阿仙奴強，今晚作客酋長球場坐和望贏。推介：和波2:2